Северна Кореја истрела две балистички ракети од нејзиниот источен брег, јавува Ројтерс, повикувајќи се на јужнокорејската војска.
Јапонската крајбрежна стража исто така извести за сомнителен ракетен тест.
Веста доаѓа додека Сеул и Вашингтон спроведуваат заеднички поморски вежби во водите на источниот брег на Јужна Кореја во кои учествува и американски носач на авиони.
Американскиот потпретседател Камала Харис се очекува утре да пристигне во главниот град на Јужна Кореја по посетата на Јапонија.
Ова е уште еден тест на балистичка ракета од страна на Северна Кореја во последните денови. Во неделата , Пјонгјанг повторно истрела проектил во морето во близина на неговиот источен брег.
Од 2006 година, Северна Кореја е предмет на санкции на ОН , кои Советот за безбедност постојано и едногласно ги зајакнуваше во текот на годините во обид да го прекине финансирањето на нејзините програми за нуклеарно оружје и балистички ракети.
Пјонгјанг ги отфрла резолуциите на ОН како кршење на неговото суверено право на самоодбрана и истражување на вселената и ги наведе воените вежби на САД и Јужна Кореја како доказ за своите непријателски намери.
Во последниве месеци, исто така, се зголемија стравувањата дека Северна Кореја се подготвува да ги продолжи нуклеарните тестови за прв пат од 2017 година , откако историските самити со тогашниот американски претседател Доналд Трамп и другите светски лидери во 2018 година не успеаја да го одвратат Ким да развие нуклеарно оружје.
Претходно денеска, јужнокорејски извори изјавија дека првата нуклеарна проба на Северна Кореја од 2017 година, доколку тоа се случи, најверојатно ќе се случи меѓу 16 октомври и 7 ноември.
Минатата недела, претседателот на Здружениот генералштаб на Јужна Кореја, генерал Ким Сон-кјум, предупреди дека доколку Северна Кореја прибегне кон употреба на нуклеарно оружје, таквиот потег ќе ја остави „без сценарио за опстанок на нејзиниот режим“.
Неговите коментари дојдоа откако Северна Кореја на 9 септември усвои закон со кој се потврдува нејзиното право да изврши превентивни напади со нуклеарно оружје за да се одбрани во случај на непосреден напад од кој било вид насочен против севернокорејското раководство и командата на нејзините нуклеарни сили.