Младите мажи на возраст од 18-25 години во Франција од 1 јануари следната година ќе добиваат бесплатни кондоми од аптеките. Ова го соопшти претседателот на Франција, Емануел Макрон. Одлуката е донесена во позадина на порастот на сексуално преносливите болести во земјава.
„Ова е мала револуција со цел превенција“, рече Макрон во објавувањето на мерката.
Заклучно со 2018 година, како дел од мерките за борба против СИДА и сексуално преносливи болести, парите потрошени за кондоми се враќаат од здравственото осигурување доколку средствата за превенција се набавени со лекарски рецепт. Но, за оваа мерка знаеле само 21 отсто од малолетните и 29 отсто од 18 до 24-годишниците. Истовремено, се пријавува и зголемување на случаите на сексуално преносливи болести кај младите.
Меѓу другите превентивни мерки, Макрон ја посочи вакцинацијата на тинејџерите против инфекции поради папиломавирус, кои се поврзани со појавата на одредени видови на рак, како што е тој на матката.
Буџетот за здравствено осигурување, усвоен минатата недела од францускиот парламент, предвидува и бесплатна итна контрацепција за сите жени без лекарски рецепт.