Американскиот претседател Џо Бајден следната недела ќе биде домаќин на средба на високо ниво со Африка за заживување на односите со континентот наспроти конкуренцијата од Кина и Русија, пренесе Франс прес.
Тридневниот самит во Вашингтон ќе биде можност да се објават нови инвестиции, да се зборува за безбедноста на храната – влошена од војната во Украина – и климатските промени, но и за демократијата и владеењето. И можеби најмногу од сè да покажат дека САД сè уште се грижат за Африка, осум години по првиот таков самит во 2014 година под претседателот Барак Обама.
Поранешниот претседател Доналд Трамп не крие дека е незаинтересиран за африканскиот континент, додека Џо Бајден, застапник на мултилатерализмот, има намера да ја врати Африка во центарот на светската дипломатија. Тој ја поддржува идејата за место за Африка во Советот за безбедност на ОН и ќе повика на самитот Африканската унија да биде формално претставена во Г20, рече претседателскиот советник.
Кина е најголемиот заемодавач на сиромашните и земјите во развој во светот и има инвестирано многу во африканскиот континент богат со ресурси.
Слично на тоа, Русија значително го зголеми своето присуство таму, вклучително и со испраќање платеници, и одржува блиски врски со некои престолнини, особено со оние кои на почетокот на март одлучија да не ја поддржат резолуцијата на ОН за осуда на инвазијата на Украина – главен извор на тензии во односите со Соединетите држави.