Фризерите во Белгија собираат коса од своите клиенти и ја даваат на невладина организација, која пак ја рециклира и ја користи за заштита на животната средина, објави Ројтерс.
Проектот за рециклирање на коса собира прамени коса и ги внесува во машина која ги плете во плочки кои можат да се користат за апсорпција на масло или други јаглеводороди кои ја загадуваат животната средина. Косата може да се претвори и во биокомпозитни кеси.
Според еден од креаторите на проектот – Патрик Јансен, еден килограм човечка коса може да апсорбира околу 7-8 литри нафтени деривати. Плочките може да се стават во одводи за да го апсорбираат загадувањето пред да стигне до реките.
„Нашите производи се уште подобри и поради фактот што се произведуваат овде, не се увезуваат од другата страна на светот“, изјави тој за Ројтерс. „Тие се направени овде за да се решат локални проблеми.
Веб-страницата на проектот објаснува дека човечката коса има неверојатни својства. Едно влакно, на пример, може да издржи и носи 10 милиони пати повеќе од сопствената тежина. Косата може да апсорбира масти и јаглеводороди, се раствора во вода и е исклучително еластична, благодарение на кератинот што го содржи.
Изабел Вулкидис, менаџер на салон во Брисел, е меѓу десетиците фризерки во земјата кои плаќаат мал надомест на проектот за да ја соберат косата што ја шишаат. „Мислам дека е штета што фрламе коса во канта кога знаеме за колку работи може да се користи“, вели таа.