Уште една кинеска провокација кон Тајван. Тајван ја осуди Кина за одржувањето на втората воена вежба околу островот за помалку од еден месец. Министерството за одбрана соопшти дека пресретнало 57 кинески авиони, пренесува Ројтерс.
Кина го смета демократски управуваниот Тајван како своја територија и го засилува воениот, политичкиот и економскиот притисок за да ги потврди овие тврдења.
Командата на Народноослободителната војска соопшти дека нејзините сили спровеле заеднички патроли за борбена готовност и вистински борбени вежби во морето и воздушниот простор околу Тајван, фокусирајќи се на копнени и поморски напади.
Целта беше да се тестираат заедничките борбени способности и одлучно да се спротивстават на провокативните акции на странските сили и сепаратистичките сили за независност на Тајван.
Претседателството на Тајван соопшти дека Кина упатува неосновани обвинувања и остро ги осуди вежбите, велејќи дека мирот и стабилноста на Тајванскиот теснец и регионот се заедничка одговорност и на Тајван и на Кина. Ставот на Тајван е јасен – нема да ескалира конфликти, ниту да предизвикува спорови, туку цврсто да го брани својот суверенитет и безбедност.
Во понеделникот, тајванското Министерство за одбрана соопшти дека открило 57 кинески авиони кои летале во зоната за воздушна одбрана на Тајван и четири поморски бродови во изминатите 24 часа .
Некои од авионите, вклучително и ловци-бомбардери, ја преминаа средната линија на Тајванскиот теснец, неофицијален тампон меѓу двете земји.
Во слични вежби кон крајот на минатиот месец, 43 кинески авиони го преминаа воздушниот простор на островот.
Кина, која никогаш не бегаше од употреба на сила за да го стави островот под своја контрола, во последните три години вршеше редовни воени упади во водите и воздушниот простор во близина на Тајван.