„Мајкрософт“ денеска објави дека ќе укине 10.000 работни места на крајот на третиот квартал од фискалната 2023 година, што е уште еден доказ за забрзување на процесот на ослободување на персоналот во американскиот технолошки сектор, пренесе Ројтерс. Ова се случува додека компаниите се подготвуваат за економски пад.
Намалувањата и поврзаните трошоци на хардверското портфолио, како и другите промени, ќе ја чинат компанијата 1,2 милијарди долари во вториот квартал од фискалната 2023 година, што негативно ќе влијае на заработката по акција за 12 центи, соопшти Мајкрософт, цитирајќи од БТА.
Во писмо до персоналот со копија до Ројтерс, главниот извршен директор на американската технолошка компанија, Сатја Надела, информираше дека потрошувачите сакаат да ги „оптимизираат своите дигитални трошоци за да прават повеќе со помалку“. Тој, исто така, повика на претпазливост бидејќи „некои делови од светот се во рецесија, а други го очекуваат тоа“.
Веста за отпуштањата, која вчера беше објавена во медиумите, доаѓа по технолошките отпуштања минатата година.
Мајкрософт минатиот јули објави дека се скратени мал број позиции, а информативниот сајт Аксиос во октомври објави дека компанијата укинала помалку од 1.000 работни места во некои одделенија.
Компанијата предводена од Надела, исто така, се бори со пад на пазарот на персонални компјутери, откако пандемискиот бум избледе и побарувачката за Windows и неговиот придружен софтвер опадна.