Украинскиот премиер Денис Шмигал има двегодишен распоред за обезбедување на членството на неговата земја во ЕУ, што сигурно ќе доминира во дискусиите на овонеделниот историски самит ЕУ-Украина – првиот што ќе се одржи на украинска територија, објави Политико.
Според изданието, никој во ЕУ не мисли дека тоа е реално.
Еврокомесарите ќе отпатуваат за Киев подоцна оваа недела пред самитот во петок со украинскиот претседател Володимир Зеленски и шефовите на Европската комисија и Советот.
Самиот Шмигал поставува тежок рок. „Имаме многу амбициозен план за влез во Европската унија во следните две години“, изјави тој за Политико. „Значи, очекуваме дека оваа година, во 2023 година, веќе ќе можеме да ја одржиме оваа прелиминарна фаза од пристапните преговори“, рече тој.
Минатата година францускиот претседател Емануел Макрон рече дека може да поминат „децении“ пред Украина да се приклучи на ЕУ, потсетува Политико. Дури и лидерите на ЕУ, кои го поддржаа кандидатскиот статус на Украина на нивниот самит во јуни минатата година, во приватни разговори признаваат дека изгледите за приклучување на земјата всушност се со години. На крајот на краиштата, земјите кандидати како Србија, Турција и Црна Гора чекаат многу години – од 1999 година во случајот со Анкара, се потсетува публикацијата.