Претставниците на Европскиот парламент денеска со 370 гласа за, 282 против и 36 воздржани гласаа за ново свикување на Европската комисија под раководство на Урсула фон дер Лајен, која е во втор мандат на оваа функција. Фон дер Лајен во својот говор пред гласањето зборуваше за приоритетите во работата на Комисијата во наредниот период, истакнувајќи ја безбедноста на континентот, декарбонизацијата и иновациите како три главни приоритети. Веднаш откако зборуваше за одбраната на европскиот континент, Фон дер Лајен го спомена и регионот на Западен Балкан, како дел од иднината на Европската унија, но и регион изложен на руски закани. Токму поради тоа, нагласи таа, посветеноста на Европа кон овие земји ќе биде уште посилна.
„На границите на Европа беснее војна. И ние мора да бидеме подготвени за она што ни претстои – да работиме рамо до рамо со НАТО. Знаеме дека треба да направиме многу повеќе заедно како Европејци. Само еден број. Русија троши до девет отсто од својот БДП за одбрана. Европа троши во просек 1,9 отсто. Нешто не е во ред со оваа равенка. Нашите трошоци за одбрана мора да се зголемат. Ни треба единствен пазар за одбрана. Мора да ја зајакнеме одбранбената индустриска база. Мора да ја подобриме нашата воена мобилност. И ни требаат заеднички европски одбранбени проекти. И затоа Андриус Кубилиус ќе биде првиот европски комесар за одбрана. Немаме време за губење. И ние мора да бидеме амбициозни колку и да се сериозни заканите. Затоа, во првите 100 дена ќе излеземе со Бела книга за иднината на европската одбрана. Можам да ве уверам дека безбедноста на Европа секогаш ќе биде приоритет на оваа Комисија“, нагласи Фон дер Лајен.
Таа нагласи дека оваа борба не се однесува само на земјите-членки, туку и на регионите надвор од сегашните граници на ЕУ.
„Сонот за Европа се протега на Западен Балкан, Украина, Молдавија и пошироко. Ја видовме храброста на народот на Украина во продолжувањето на своето европско патување. Ја видовме издржливоста на народот на Молдавија да ја задржи својата европска иднина. Ја видовме посветеноста на Западен Балкан за реформи, раст и подготовка за влез во нашата Унија“, изјави таа.
Во исто време, додаде таа, „видовме дека Русија нема да застане на ништо за да ги спречи од европската иднина“.
„Но, почитувани претставници, посветеноста на Европа кон овие земји секогаш ќе биде посилна. Нека нема сомнеж, ние ја сакаме Украина како дел од Европската унија. Значи, ќе стоиме на страна на Украина се додека тоа е потребно. Ќе се подготвиме со реформите што ни се потребни на наша страна. И ние ќе ги поддржуваме овие земји на секој чекор во нивниот процес заснован на заслуги додека не бидат подготвени да влезат во нашата Унија“, подвлече шефот на Комисијата.
Таа ја издвои новата комесарка за проширување, словенечката кандидатка Марта Кос, за која рече дека има богато искуство и „е вистинската личност за оваа работа“.
„Визијата за континент обединет со демократија, владеење на правото и почитување на основните слободи секогаш ќе ја движи нашата работа. Затоа што луѓето од овие земји заслужуваат иднина со мир, напредок и просперитет. И ние ќе се погрижиме таа иднина да биде во Европа“, нагласи таа.