Што се знае за Ал Џолани, џихадистичкиот водач на Хајат Тахрир ал-Шам, кој се чини дека се обидува да го промени својот имиџ? Неговото минато е поврзано со исламистички групи, а САД најавија награда за неговата глава, пишува Дојче веле .
Речиси не поминува ден без Абу Мухамед ал Џолани да испрати нова порака. Бунтовниците предводени од него постигнувале еден воен успех по друг.
Во меѓувреме, Абу Мухамед ал Џолани дури се појави на CNN. Во неговото интервју за американскиот телевизиски канал се виде дека тој не се однесува како победник – барем засега, коментира германската јавна телевизија АРД. За време на разговорот, брадестиот ги повикува своите борци да го поштедат цивилното население. На пример, пред да влезат исламистите во градот Хама, нивниот водач рече дека му се моли на семоќниот Алах дека ова „ќе биде ослободување без одмазда – ослободување исполнето со милост и добрина“, го цитира германското издание.
42-годишниот водач на бунтовниците испрати и порака до меѓународните сојузници на режимот на Асад – ги повика да се држат настрана бидејќи ова е прашање меѓу Сиријците. Тој апелираше до политичарите во Ирак да не дозволат интервенција на ирачките милиции во Сирија и да не поддржуваат осуден режим на пропаст, наведува АРД.
Неговиот татко беше противник на Асад
Ахмед ал Шара, вистинското име на Ал Џолани, е роден во Саудиска Арабија. Неговото семејство потекнува од Голанската Висорамнина. Како противник на режимот на Асад, неговиот татко поминал многу години во сириските затвори пред да побегне во егзил.
Како џихадист, неговиот син го усвоил борбеното име Абу Мухамед ал Џолани. Постојат знаци дека тој сега сака да ја отфрли својата репутација на агресивен исламист.
Во врска со тоа, АРД го цитира египетскиот воен експерт Мохамед Абдел Вахед, кој исто така ја забележал оваа промена на сликата: „Бунтовниците ги напуштија своите претходни тактики на џихадистите. Ал Џолани ја тргна својата исламска наметка и се претставува пред светот преку неговите интервјуа. Тој зборува потивко и се обидува да го употреби вокабуларот на државник“, вели набљудувачот. Сепак, дали џихадист може да стане државник, реторички прашуваат германските јавни медиуми.
Во моментов, Абу Мухамед ал Џолани е моќниот човек на денот во Сирија. Многу секуларни противници на Асад, исто така, го слават напредувањето на бунтовниците како ослободување. Но, тоа не може да го замолчи скептицизмот. Ал Џолани имал блиски врски со терористичката организација „Исламска држава“ и бил дел од „Фронтот Ал Нусра“ – сирискиот огранок на „Ал Каеда“. САД му одредуваат награда од 20 милиони долари на неговата глава.
Раскинување со Ал Каеда
Абу Мухамед ал Џолани раскина со Ал Каеда пред неколку години, а групата Хајат Тахрир ал Шам што тој ја предводи ја прошири својата моќ во делови од провинцијата Идлиб во северозападна Сирија во последниве години. Џихадистите брутално се справуваат со своите противници, а во Идлиб се обвинети за тортура и протерување на малцинствата.