Израелската војска соопшти дека ја завршила операцијата во болницата Камал Адван во северниот дел на Газа, откако тие упаднале во установата во петокот, принудувајќи ги пациентите и персоналот да се евакуираат, објави Ал Џезира.
Во соопштението објавено на Телеграм, војската соопшти дека привела повеќе од 240 лица. Во петокот израелските сили запалија делови од болницата.
Војската потврди и дека директорот на болницата Камал Адван, Хусам Абу Сафија, бил уапсен на сослушување.
Исмаил ал-Кахлут, медицински техничар во болницата Камал Адван, кој беше ослободен откако беше приведен од израелските сили, претходно изјави дека бил задржан во „тешки услови“ повеќе од 12 часа.
„По напуштањето на болницата, видовме размери на уништување што моите зборови не можат да го опишат. Огромни области се срамнети со земја, како Израелците да сакаат да ги избришат од картата“, изјави Ал Кахлут за Ал Џезира.
„Израелските војници нѐ држеа врзани и со врзани очи, каде што можевме да ги слушнеме луѓето како врескаат, но не можевме да знаеме кој точно е тепан“, додаде тој.
Ал Кахлут истакна дека израелските војници ги тепале со „стапови и палки“ и не им дале вода да пијат. Тој изјави и дека не смеат да одат во тоалет или да се молат стоејќи.
Шорук ал-Рантиси, која исто така беше заробена во истата болница, рече дека израелските војници претепале 20 нејзини колеги медицински сестри и сопругата на лекар затоа што одбиле „да го покажат својот стомак“.