Утрово на скопскиот аеродром слетаа првите авиони од Барселона и Лион, со што официјално стартуваа новите директни авиолинии што се дел од владината политика за финансиска поддршка на нови дестинации и авиопревозници.
Вицепремиерот и министер за транспорт, Александар Николоски, преку видео порака објавена на својот Фејсбук профил, истакна дека со овие летови се отвораат нови перспективи за туризмот и економијата.
„Ова значи многу за зголемување на туризмот и подобрување на економијата. Преку новите летови придонесуваме да се зголеми бројот на патници на скопскиот и охридскиот аеродром. Само за неколку месеци имаме 10 нови дестинации. Ќе има уште многу нови летови, повеќе туристи, повеќе бизнис-размени и нови можности за граѓаните“, порача Николоски.
Летовите се дел од програмата за субвенционирање на нови авиолинии, што, според ресорниот министер, веќе ги дава првите резултати.