Двајца вработени на Универзитетот „Гоце Делчев“ во Штип се уапсени под сомнение за злоупотреба на службената положба и компјутерска измама. Според Министерството за внатрешни работи, станува збор за раководителот на информатичкиот сектор Р.Т. (44) и М.М.Н. (44), советничка во студентската архива, против кои е поднесена кривична пријава.
Според информациите од МВР, првоосомничениот подолг временски период, во замена за различни парични надоместоци, им овозможувал на студенти од Турција да пријавуваат и полагаат испити надвор од законски предвидените рокови.
Се сомничи и дека незаконски менувал и бришел оценки и кредити во електронските индекси, со што им овозможувал на студентите неосновано да запишуваат нов семестар или академска година. Дополнително, во електронскиот систем внесувал податоци дека школарината е платена, иако уплатите не биле извршени.
На 3 ноември полицијата спровела координирана акција со претреси на повеќе локации во Штип и Скопје, по наредба на Основниот суд во Штип.
При претресот во домот на Р.Т. биле пронајдени и одземени 954.800 денари, 4.750 евра и 600 американски долари, како и три лаптоп-компјутери, четири мобилни телефони, четири УСБ-уреди и документација. Претрес бил извршен и во просториите на Универзитетот, каде што бил одземен компјутер.
При проверката на електронскиот систем за студентска евиденција и универзитетските бази на податоци, истражителите откриле дигитални траги од извршени измени поврзани со двајцата пријавени.
По дополнителна судска наредба бил претресен и домот на М.М.Н., по што и таа била лишена од слобода.
Против двајцата е поднесена кривична пријава до Основното јавно обвинителство во Штип, кое ќе постапува по случајот.