По петти пат, Македонија ќе биде домаќин на најголемата волонтерска еко-акција Генералка викенд, што ќе се одржи на 9, 10 и 11 мај. Акцијата, организирана од Мен енд Маунтен, се спроведува со поддршка од ЗЕЛС, Црвениот крст, Министерството за животна средина, како и бројни други институции и организации.
На повеќе од 500 локации низ сите општини, над 20.000 волонтери ќе го дадат својот придонес за почиста и поздрава животна средина. Ќе се вклучат над 600 организации, институции, училишта, компании, пензионерски и граѓански здруженија, јавни институции, локални заедници и национални паркови.
Официјалниот старт ќе биде означен на Скопскиот Аквадукт на 9 мај во 9 часот, каде повеќе од 200 волонтери ќе ја исчистат околината на овој значаен културно-историски локалитет.
Во партнерство со Министерството за образование и наука и УНИЦЕФ, акцијата годинава првпат се проширува и во училиштата преку едукативниот проект „Еко час“. Учениците ќе имаат задача три дена по ред да се вклучат во еколошки активности:
9 мај – чистење на училиштата со наставниците,
10 мај – чистење на домовите и околината со семејствата,
11 мај – чистење паркови и излетнички места.
Секој тим ќе треба да документира фотографски и да ги презентира резултатите на првиот нареден час.
Акцијата не завршува тука. Врз основа на 10-годишниот меморандум со Министерството за земјоделство и Национални шуми, во ноември се одржува втората фаза – Сончeва гора, посветена на пошумување. За секои 10 килограми собран отпад, се засадува едно дрво. Досега се засадени над 120.000 садници на повеќе локации низ земјата.
Во изминатите четири години:
Собрани се над 1 милион килограми отпад,
Вклучени се повеќе од 44.000 волонтери,
Исчистени се над 1000 локации,
Засадени се над 120.000 дрвја.
Генералка викенд стана симбол на колективна еко-свест и граѓанска одговорност. Овој уникатен настан, не само во Македонија, туку и на Западен Балкан, испраќа моќна порака: загадувањето е заеднички непријател, а решението лежи во заедничка акција.