Независните граѓански иницијативи денеска упатија барања до Министерството за правда, Собранието и другите надлежни институции за итни измени на Изборниот законик. Целта на овие измени е да се олесни кандидатурата и учеството на независните кандидати и независните листи на претстојните локални избори во земјава.
Јана Белчева од групата избирачи истакна дека актуелниот Изборен законик создава бројни административни и финансиски пречки за независните кандидати. Таа нагласи дека за вистинска демократија е неопходно секој граѓанин кој сака да се кандидира да има еднакви можности, без дискриминација и без непотребни пречки.
Горјан Јовановски од иницијативата „Зелен хуман град“ вели дека сегашните законски решенија ги фаворизираат големите политички партии и ги ограничуваат независните граѓански иницијативи, спречувајќи ја нивната активна улога во политичкиот живот.
Независните иницијативи ги повикаа институциите итно да ги разгледаат нивните предлози за измени и да обезбедат фер и демократски услови за сите учесници на изборите.