Верници на Македонската православна црква – Охридска Архиепископија денеска се собраа на скопскиот плоштад на мирен собир во поддршка на архимандрит Партениј како можен избор за митрополит на Дебарско-кичевската епархија. Собирот беше организиран со цел да се упати повик до Синодот на МПЦ-ОА да размисли за втор кандидат при изборот на нов митрополит.
Според присутните, актуелниот кандидат, предложен од Архиепископот г.г. Стефан, е поранешниот амбасадор во Ватикан и декан на Богословскиот факултет Ѓоко Ѓоргевски, кој неодамна беше унапреден во јероѓакон и потоа јеромонах. Но, верниците кои денеска се собраа, истакнаа дека поддршката ја даваат на отец Партениј – духовен водач со, како што велат, илјадници следбеници и исклучително влијание во црковниот живот.
– Ова не е протест, туку мирен собир на верници – луѓе кои се дел од она што се нарекува „жива црква“. Нашето барање е едноставно – да се слушне гласот на верниците и да се разгледа можноста за втор кандидат, рече еден од организаторите, Илија Ико Каров.
Тој додаде дека и покрај тоа што монашката смиреност не поддржува вакви јавни изразувања, чувствуваат морална обврска да застанат зад својот духовен водач и да побараат почитување на волјата на народот.
Сличен став изнесе и верникот Благој Веселинов, кој симболично го спореди актуелното црковно раководство со некој што прочитал прирачник за возење велосипед, но никогаш не го практикувал.
– Владиката Партениј не е само духовник, туку и водач, учител, пастир на илјадници верници. Нашата поддршка за него не значи отфрлање на другите, туку повик на разум и слушање на гласот на народот, рече Веселинов.
Собирот помина мирно, без инциденти, а учесниците најавија дека и понатаму ќе ги следат одлуките на Синодот и ќе останат активни во искажувањето на својата поддршка за отец Партениј.