Американскиот претседател Доналд Трамп пријавил приход од над 600 милиони долари во 2024 година, вклучително и од криптовалути, голф-центри, лиценцирани договори и други деловни активности, покажа неговиот последен јавен финансиски извештај.
Според годишниот финансиски извештај, Трамп пријавил средства во вредност од најмалку 1,6 милијарди долари, објави Ројтерс.
Иако тврди дека неговите бизниси се во рацете на фонд управуван од неговите деца, приходите од тие извори продолжуваат да се евидентираат на негово име, што предизвика нови критики и обвинувања за конфликт на интереси.
Голем дел од приходите на Трамп доаѓаат од инвестиции во дигитални средства.
Само криптовалутата „$TRUMP“, лансирана претходно оваа година, се проценува дека генерирала приход од околу 320 милиони долари.
Неговото семејство, исто така, заработило повеќе од 400 милиони долари преку партнерството со финансиската фирма World Liberty Financial, вклучувајќи 57,35 милиони долари од продажба на токени, и поседување на 15,75 милијарди управувачки токени.
Трамп, исто така, има удел во „Трамп Медиа енд Технолоџи Груп“, сопственикот на социјалната мрежа „Трут Сошнал“, дополнително проширувајќи го своето деловно портфолио кое опфаќа дигитални средства до традиционални сектори како што се недвижности и голф.
Од инвестиции во хартии од вредност и фондови, Трамп пријавил приход од најмалку 12 милиони долари врз основа на инвестиции од најмалку 211 милиони долари.
Најголемите инвестиции вклучуваат „Блу Аул Капитал“, како и фондови од државни обврзници управувани од Чарлс Шваб и „Инвеско“.
Приходите од голф клубови претставуваат значаен дел од неговиот вкупен приход.
Трите голф одморалишта на Трамп во Флорида – „Џупитер“, „Дорал“ и „Вест Палм Бич“ – и неговиот приватен клуб, „Мар-а-Лаго“, генерираа најмалку 217,7 милиони долари.
„Трамп Нешнал Дорал“, луксузен одморалиште во близина на Мајами, само донесе 110,4 милиони долари. Трамп, исто така, оствари меѓународни приходи, вклучувајќи 16 милиони долари авторски права од проект во Дубаи, 10 милиони долари од развој во Индија и 5 милиони долари од договор во Виетнам.
Приходите, исто така, вклучуваат авторски права, вклучувајќи 2,8 милиони долари од часовниците на Трамп, 2,5 милиони долари од парфеми и патики, 1,3 милиони долари од Библијата Гринвуд и 1,16 милиони долари од дигиталните картички на NFT со неговиот лик.
Првата дама Меланија Трамп пријави приход од 216.700 долари од сопствената колекција на NFT.
Иако извештајот не го наведува точниот временски период што го опфаќа, податоците укажуваат дека се однесува на календарската 2024 година. Белата куќа не коментираше за ова прашање.