МАЖ кој исчезна пред повеќе од една недела во огромната дивина на Британска Колумбија, Канада, е пронајден жив откако го напиша зборот „ПОМОШ“ на карпа и „SOS“ во калта. Ендру Барбер, 39, преживеал девет дена пиејќи вода од локва и градејќи импровизирано засолниште додека спасувачите не го пронашле, објавува Би-Би-Си.
Барбер исчезнал на 31 јули во близина на езерото Меклис, околу 360 милји северно од Ванкувер, откако неговиот камион се расипал. Девет дена подоцна, на 8 август, хеликоптер на Кралската канадска коњичка полиција (RCMP) го забележал неговото возило на шумски пат, што значително ја стеснило областа за пребарување и на крајот довело до негово спасување.
Спасување во последен момент
Полициски хеликоптер набрзо го забележал Барбер во близина на неговото импровизирано засолниште. Пораката „ПОМОШ“ што ја напишал на карпата го привлекла нивното внимание. Тој бил тешко дехидриран и имал повреда на ногата, но според водникот Бред Мекинон, сега „е доста добро“.
„По повеќе од една недела во дивината, тој беше пронајден жив за време на воздушно пребарување денес“, објави локалната волонтерска група за пребарување и спасување „Кеснел Срч енд Рескју“ на Фејсбук. „Овој исход е резултат на безброј часови на земја и во воздух, користејќи секој ресурс и технологија што ни е достапна.“
Спасувачкиот тим, исто така, сподели фотографија од засолништето што Барбер го изградил од стапчиња и кал, потпрено на карпа на која напишал порака за помош. По спасувањето, тој бил однесен во болница, каде што бил лекуван и отпуштен.
МекКинон изјави за „Канадиан прес“ дека Барбер „јадел што можел да најде“ додека бил во шумата. „Тој буквално голтал валкана вода од езерце за да остане хидриран“, рече тој. „Човечкото тело може да издржи долго време без храна, но водата е друга приказна.“
Боб Цимерман, претседател на „Кеснел Рескју“, изјави за CBC News дека не е сигурен дали Барбер „ќе издржеше уште 24 часа ако не го најдевме ние“.