Под слоганот „Не во наше име“, граѓанската иницијатива „Сите за Палестина“ вчера одржа протест пред Министерството за надворешни работи, барајќи од Владата да ја промени својата надворешна политика и да престане да гласа против правото на самоопределување на палестинскиот народ во Обединетите нации.
Говорниците на протестот оценија дека надворешната политика на државата е противречна, потсетувајќи дека и самата Македонија во минатото добила меѓународна поддршка за својата независност, а денес е меѓу малкуте земји што не ја признаваат Палестина.
„Со тоа, индиректно го поддржува геноцидот кој се одвива во Газа. Повикуваме на хуманост, емпатија и солидарност, а предупредуваме и дека молкот на властите пред бизнис интересите е соучесништво во злосторство“, посочија од иницијативата.
Организаторите до Владата доставија и листа со конкретни барања, меѓу кои се издвојуваат: Гласање „за“ Палестина на сите идни сесии на ОН, вклучително и за полноправно членство и хуманитарна помош.
Осуда на геноцидот во Газа преку официјален став на државата. Воведување санкции против Израел и прекин на трговските односи, за кои тврдат дека „директно финансираат воени злосторства“. Според нив, во периодот 2021-2023, Македонија имала трговски дефицит со Израел од речиси 20 милиони евра. Прекин на академската соработка со израелски институции, вклучително и меморандумот со Универзитетот „Бен Гурион“.
„Македонската влада не ги застапува интересите на народот, ниту вредностите со кои се кити на меѓународната сцена. Народот секогаш ја вреднувал солидарноста, хуманоста и мирот – затоа бараме Македонија да застане на вистинската страна на историјата“, порачаа организаторите, повикувајќи на континуиран притисок врз институциите.