Почина 16-годишното момче од Идризово кое на 14 септември се повреди во сообраќајната несреќа што се случи во село Марино, општина Илинден. Од семејството за Канал 5 потврдија дека момчето им подлегнало на тешките повреди.
Несреќата се случила кога мопед управуван од 16-годишникот удрил во џип марка „Хјундаи Тусон“ со гевгелиски регистарски ознаки, управуван од С.Ј. (36) од Гевгелија, кој според информациите е пратеник од партијата Левица.
Во судирот, со тешки телесни повреди се здобиле тинејџерот и неговата 13-годишна сопатничка од Илинден, кои биле пренесени на Клиниката „Мајка Тереза“. Возачот на автомобилот и неговиот сопатник (25) од Вевчани се здобиле со полесни повреди и биле згрижени во Градската болница „Св. Наум Охридски“.
На местото на несреќата увид извршила екипа од СВР Скопје, а по наредба на јавен обвинител, возачот С.Ј. бил лишен од слобода околу 04:00 часот поради сомнение за „загрозување на безбедноста на сообраќајот“ и „тешки дела против безбедноста на луѓето и имотот во сообраќајот“, според членовите 297 и 300 од Кривичниот законик. По целосно документирање на случајот, ќе следи соодветна пријава, соопшти МВР.
Од партијата Левица реагираа дека Јанчев не возел под дејство на алкохол и дека не ја надминал дозволената брзина, додавајќи дека мопедот се забил во совозачката врата на возилото.
„Несреќата се случи по полноќ, кога нерегистриран и технички неисправен моторцикл без светло, управуван од малолетник без возачка дозвола и заштитна кацига, со неприлагодена брзина се забил во совозачката врата на автомобилот управуван од пратеникот Јанчев, кој имал вклучен жмигавец за свртување десно“, соопштија тогаш од МВР.