Од 1 јули стапуваат во сила нови правила на Европската Унија со кои дел од лесните комерцијални возила и комбиња ќе мора да бидат опремени со паметни тахографи од новата генерација (Г2В2), со цел поефикасна контрола на времето на возење, одмор и работните активности на возачите во меѓународниот транспорт.
Обврската се однесува на возила со максимална дозволена маса од 2,5 до 3,5 тони, вклучително и со приколка, кои вршат меѓународен превоз или каботажа во рамките на Европската Унија. Досега тахографи беа задолжителни само за возила потешки од 3,5 тони, а со новата регулатива контролата се проширува и на полесните комерцијални возила што сообраќаат прекугранично.
Новите паметни тахографи ќе регистрираат преминувања на државни граници, местата на утовар и истовар, како и работното време и активностите на возачот. Техничките барања за генерацијата Г2В2 предвидуваат напредни функции за позиционирање и побрза размена на податоци со надзорните служби, што ќе овозможи поефикасни контроли покрај пат.
Од обврската се изземени возила што се користат за транспорт на материјали до градилишта во радиус до 100 километри, возила за некомерцијална употреба, како и превоз на рачно изработена стока под утврдени услови. Овие исклучоци важат само доколку се исполнети пропишаните ограничувања за намена и растојание.
Новите правила не важат само во земјите членки на Европската Унија, туку и во Швајцарија, Норвешка, Исланд, Лихтенштајн и Обединетото Кралство. Дел од меѓународните договори за работното време на возачите, познати како АЕТР, не се опфатени со оваа мерка.
Регулативата има за цел да обезбеди подобра примена на правилата за безбедност на патиштата и заштита на работничките права, како и да спречи злоупотреби поврзани со прекумерно возење и непочитување на пропишаните паузи во меѓународниот товарен превоз.