Сите хируршки сали во Клиничкиот центар во моментов функционираат без прекин, информира Министерството за здравство, откако во јавноста се појавија информации поврзани со условите за работа во здравствените установи.
Од ресорното министерство посочуваат дека клиниките за торакална хирургија, кардиохирургија, урологија, детска хирургија, пластична хирургија, дигестивна хирургија и ОРЛ непречено ги извршуваат оперативните зафати и ги третираат пациентите, вклучително и оние со закажани елективни интервенции.
Според информациите од надлежните, во овие клиники нема одложување на оперативната програма, а на Клиниката за ТОАРИЛУЦ во моментов се згрижуваат итните пациенти согласно организацијата на работата.
Министерството информира и дека резервниот систем за климатизација во Клиничкиот центар функционира нормално и обезбедува соодветни услови за работа на медицинскиот персонал и третман на пациентите.
Од здравствените власти додаваат дека намалувањето на бројот на хируршки интервенции во летниот период е вообичаена појава и не е поврзано со функционирањето на системот за климатизација.
Воедно, Министерството апелира информациите за состојбите во здравствениот систем да се проверуваат преку надлежните институции, со цел да се избегне ширење непотребна загриженост кај граѓаните.