Дали некогаш сте виделе таксисти во сиви панталони и бели кошули кои ви нудат локум и колоњска вода додека над вас летаат борбени авиони Ф-16? Ова не е филм, ова е Анкара денес.
Поздрав од главниот град на Турција, ексклузивно за 4news.mk. Денеска тука започнува 36-тиот Самит на НАТО, а градот е претворен во вистинска тврдина што дише под невидени безбедносни мерки.
Очекуваме 52 лидери од сојузничките и поканетите земји. За нив се на должност вкупно 56 илјади припадници на обезбедувањето. Дури 40 илјади полицајци патролираат 24 часа на ден, небото го чуваат системи за воздушна одбрана, а патиштата денеска и утре ќе бидат целосно блокирани. На 100 критични локации се инсталирани напредни камери со системи за препознавање лица.
Но, она што е апсолутен хит низ улиците е новиот протокол за таксистите. За да ги пречекаат странските дипломати, тие мора да носат строг дрес-код и задолжително да ги нудат патниците со колоњска вода и локум. Турско гостопримство на највисоко ниво.
И уште еден неверојатен логистички детал. Пистата на воениот аеродром „Етимесгут“ беше специјално проширена од 42 на 60 метри ширина и продолжена на 3 илјади метри. Зошто? За да може безбедно да слета авионот на американскиот претседател Доналд Трамп, кој доаѓа на овој самит – настан што се смета за пресвртница и момент на повторно зближување меѓу Европа и САД.
Сепак, целата оваа организација си има своја цена. Секое поставување шатор, делење летоци или марширање е кривично дело деновиве. Во пресрет на самитот, стотици луѓе беа уапсени, а контроверзијата е во тоа што апсењата се вршеа само врз база на разузнавачки информации, без конкретни докази.
Самитот трае само два дена, но промените што ги донесе ќе остават траен белег во главниот град. За првпат, во програмата е вклучен и Форум за одбранбена индустрија.