Кинескиот лидер Си Џинпинг ќе ги посети Соединетите Американски Држави на 24 септември, потврди американскиот претседател Доналд Трамп, пренесува агенцијата „Ројтерс“. Според најавите на Трамп, клучна тема на нивната претстојна средба ќе биде развојот и регулацијата на вештачката интелигенција.
Оваа посета доаѓа по дипломатското приближување меѓу двете суперсили, откако претседателот Трамп оствари официјална посета на Кина во средината на мај.
Како подготовка за лидерскиот самит, американскиот државен секретар Марко Рубио и кинескиот министер за надворешни работи Ванг Ји веќе одржаа состанок на кој ги дефинираа областите за потенцијална соработка. Двете страни се усогласија дека е потребно да се постават цврсти основи за, како што оценија, „многу позитивна посета“ на претседателот Си на Вашингтон.