Предлог-законот за правична застапеност сè уште ја чека одлуката на претседателот на Собранието, Африм Гаши, за да биде ставен на гласање. За негово усвојување во законодавниот дом е потребно таканареченото „мало Бадентерово мнозинство“, односно поддршка од мнозинството присутни пратеници кои припаѓаат на немнозинските етнички заедници.
Пратеникот од редовите на ДУИ, Илир Хасани, денеска од собраниската прес-сала испрати јасна порака дека опозицијата нема да дозволи овој закон да помине. Тој упати сериозни обвинувања дека власта се обидува да го „прошверцува“ ова законско решение.
„Ние сме упорни во заштита на нашиот концепт дека тој закон не треба да помине. Како опозиција го имаме Бадентеровото мнозинство, така што законот за правична застапеност во моментов е оставен зад врата и се чека погоден момент за негово контрабандирање. Ова нема да го дозволиме, како што не дозволивме ниту досега. Доколку претседателот на Собранието го стави на дневен ред, ние ќе го надгласаме и тој закон нема да помине“, — изјави Илир Хасани.
На ваквите најави од опозицискиот блок веднаш реагираа од владејачката коалиција „Влен“. Оттаму остро ги осудија блокадите и истакнаа дека со ваквото дејствување ДУИ директно се позиционира против клучните државни акти.
Според „Влен“, обидите на ДУИ да го блокира предлог-законот за правична застапеност претставуваат чекор кој е во директна спротивност со начелата на Охридскиот рамковен договор. Предизборните и коалициските ветувања за системско решавање на етничката застапеност по укинувањето на „балансерот“ остануваат точка на длабок политички раздор меѓу албанските партии во власта и опозицијата.