Топлото и стабилно време продолжува и во наредниот период, а метеоролозите најавуваат сончеви денови со многу високи температури низ целата земја.
Според прогнозата на Управата за хидрометеоролошки работи (УХМР), утре времето ќе биде сончево и топло, со мала локална облачност. Ќе дува слаб до умерен ветер од променлив правец.
Во Скопскиот регион се очекува сончево и топло време со слаб до умерен ветер од променлив правец.
Од УХМР информираат дека под влијание на топла воздушна маса која продира од југ, во текот на продолжениот викенд и до крајот на следната седмица ќе преовладува сончево и многу топло време, со мала до умерена локална облачност.
Дневните температури ќе бидат над 32 степени Целзиусови низ целата држава, а во одредени подрачја се очекува да надминат и 40 степени. Топлото време ќе се задржи и во текот на ноќните часови, соопштуваат метеоролозите.
Надлежните препорачуваат граѓаните да бидат внимателни во периодите со највисоки температури, особено хронично болните, постарите лица и најмалите деца.