Лекари во Шри Ланка отстранија камен во мочниот меур тежок 3,1 кг од маж – за кој веруваат дека е најголемиот од ваков вид досега.
Постапката беше спроведена минатата недела во болница во Тринкомали, на истокот од земјата.
55-годишниот пациент бил примен во болница откако доживеал мозочен удар. Но, додека го примале третманот, лекарите пронашле камења во неговиот мочен меур откако забележале дека има тешкотии со мокрењето.
За време на операцијата, лекарите го отстраниле каменот во мочниот меур – тежел колку бебе родено на време и бил со големина на јајце од ној.
„Според достапните записи, ова е најголемиот камен во мочниот меур некогаш документиран и отстранет со операција“, изјави за Би-Би-Си Синхала д-р Прагалатан Балакришнан, кој ја водеше операцијата.
Тој додаде дека пациентот е во „многу добра здравствена состојба“.
Пациентот останува во болница и продолжува да прима третман за други медицински состојби, велат лекарите.
Д-р Балакришнан додаде дека каменот би бил во мочниот меур на пациентот околу пет до десет години.
Камењата во мочниот меур се формираат кога минералите во урината кристализираат, претворајќи се во цврсти грутки.
Тие најчесто се јавуваат кога мочниот меур не се празни целосно, оставајќи концентрирана урина што може да се претвори во кристали.
Малите камења во мочниот меур, со големина на зрна песок, можат сами да излезат. Но, камењата поголеми од 1 см често го блокираат протокот на урина и бараат медицинска интервенција. Камен во мочниот меур што е поголем од 4 см се смета за џиновски.
Според Гинисовата книга на рекорди, најголемиот камен во мочниот меур е отстранет од пациент во Бразил во 2003 година. Тежел 1,9 кг и бил долг 17,9 см.
Каменот во мочниот меур отстранет во Шри Ланка минатата недела беше долг 18,7 сантиметри.