Зголемен број случаи на вирусот Западен Нил е регистриран во Грција во текот на август, а здравствените власти предупредуваат на внимателност во периодот кога активноста на комарците е најголема. До 19 август се потврдени 157 локално стекнати случаи и 13 смртни случаи, додека во само една недела биле регистрирани 47 нови инфекции и четири починати.
Најголем број од новите случаи се во Атика, но вирусот е регистриран и во повеќе подрачја во северна Грција, вклучително и во региони блиски до Македонија.
Според податоците на грчката Национална организација за јавно здравје (ЕОДИ), состојбата значително се влошила во споредба со почетокот на месецот. На 5 август биле евидентирани 65 случаи и шест смртни случаи, што значи дека за само две недели бројот на заразени се зголемил за 92.
Од вкупно 157 заразени, кај 116 пациенти биле забележани невролошки манифестации, како енцефалитис, менингитис или акутна флакцидна парализа. Кај 41 пациент биле регистрирани полесни симптоми или немало зафатеност на централниот нервен систем.
Во моментов 42 лица се хоспитализирани, а 23 од нив се на одделенија за интензивна или засилена нега.
Сите 13 починати биле лица постари од 65 години. Просечната возраст на смртните случаи била 82 години, при што најмладиот починат имал 66, а највозрасниот 91 година.
Најпогодена е Атика, случаи има и на северот
Атика останува главното жариште на вирусот. Речиси 70 отсто од новите случаи регистрирани во последната недела биле од ова подрачје.
ЕОДИ досега идентификувал 45 подрачја во Грција погодени од вирусот, од кои 29 се во Атика. Во текот на последната недела дополнително биле опфатени Дионисос, Петруполи и Калитеа во Атика, Александрија во Иматија и Тива во централна Грција.
Особено значајно за македонските граѓани е што случаи во текот на сезоната се регистрирани и во северните делови на Грција, меѓу кои Иматија, Солун, Пела и Серес.
Здравствените власти следат и девет подрачја во кои досега нема потврдени случаи кај луѓе, но поради близината до погодени региони, условите за ширење и резултатите од мониторингот на комарците и животните се сметаат за подрачја со висок ризик.
Вирусот се шири и во други европски земји
Состојбата во Грција е дел од поширокото сезонско ширење на вирусот Западен Нил во Европа.
Европскиот центар за превенција и контрола на болести (ECDC) предупреди дека вирусот продолжува да се појавува во нови подрачја, а најголем број случаи обично се регистрираат во август и почетокот на септември.
До 13 август, според европските податоци, во девет земји биле пријавени 429 локално стекнати инфекции. Најмногу случаи имала Италија, по која следуваат Грција, Шпанија, Македонија и Романија. Случаи биле регистрирани и во Франција, Србија, Германија и Косово.
Во Македонија, Министерството за здравство на 17 август соопшти дека се потврдени 35 случаи и три смртни случаи.
Како се пренесува и кои се симптомите?
Вирусот најчесто се пренесува преку убод од заразен комарец. Комарците се инфицираат преку птици, а потоа можат да го пренесат вирусот на луѓето.
Поголемиот дел од заразените немаат симптоми. Кај оние кај кои ќе се појават, најчести се температура, главоболка, замор, болки во мускулите и зглобовите, мачнина, повраќање и осип.
Потешката форма на болеста може да го зафати централниот нервен систем. Силна главоболка, висока температура, вкочанет врат, дезориентација, грчеви, тремор, мускулна слабост или парализа се симптоми за кои е потребна итна медицинска помош.
Најголем ризик од тешка форма имаат повозрасните лица, особено оние над 65 години, како и лицата со ослабен имунитет и одредени хронични заболувања.
Препораки за македонските туристи
За оние кои престојуваат или патуваат во Грција, здравствените власти препорачуваат засилена заштита од комарци. Се советува користење репеленти, носење облека со долги ракави и ногавици, поставување мрежи на прозорците и вратите и престој во климатизирани простории.
Посебно внимание се препорачува во утринските и вечерните часови, кога активноста на одредени видови комарци е поголема.
Иако нема причина за паника или автоматско откажување на патувањата, актуелниот број на случаи е причина за дополнителна претпазливост, особено кај повозрасните и хронично болните лица.