Специјалниот претставник на рускиот претседател за инвестиции и економска соработка со странство Кирил Дмитриев саркастично ѝ предложи на Канада да го прекине трговскиот спор со Соединетите Американски Држави (САД) така што ќе стане американска сојузна држава, јави ТАСС.
„Едноставно станете 52-та држава и опуштете се“, напиша Дмитриев на англиски на платформата Икс. Подоцна, во коментарите под објавата, додаде дека и Гренланд може да стане држава на САД.
Тој реагираше на објава на канадскиот премиер Марк Карни, кој соопшти дека Отава ги запира трговските преговори со САД и воведува реципрочни царини врз американски стоки во ист обем.
Трговскиот претставник на САД Џејмисон Грир претходно изјави дека канадската влада го одбила, според Вашингтон, поволниот договор и дека 50-процентни американски царини за одредени канадски производи стапуваат во сила во сабота. Карни потврди дека ги стопирал преговорите и најави одмаздни давачки „за заштита на работниците и бизнисот“, планирани да важат од 8 септември.
Во петок државниот секретар на САД Марко Рубио разговараше за економските односи со канадската министерка за надворешни работи Анита Ананд по договор меѓу двете земји за ново трговско спогодување, што спречи воведување дополнителни тарифи. Во средата претседателот на САД Доналд Трамп објави дека САД и Канада постигнале трговски договор, а ден претходно најави тридневна пауза во примената на 50-процентните царини на канадски производи. Според Блумберг, повикувајќи се на извори, договорот предвидува САД да ги преполоват царините на канадскиот челик и алуминиум.