Во момент кога стотици пожарникари, припадници на службите и граѓани се ангажирани во справување со пожарот во штипскиот регион, во близина на огнената зона биле фатени тројца дрвокрадци.
За случајот реагираше заменик-директорот на ЈП „Национални шуми“, Кире Михаилов, кој преку социјалните мрежи го осуди однесувањето на лицата, посочувајќи дека кражбата се случувала во непосредна близина на местото каде што се води борба со огнената стихија.
Според Михаилов, додека екипи од Штип, Струмица, Свети Николе, Кавадарци, Кочани, Берово и други градови се обидуваат да го стават пожарот под контрола и да го заштитат селото Селце, од другата страна на експресниот пат Штип–Радовиш биле затекнати лица како нелегално сечат и крадат дрва.
„Ги фативме, но срамот останува како белег“, порача Михаилов.
Во својата реакција тој ги спомна и двајцата претходно приведени поради сомнежи поврзани со подметнување на пожар во близина на Селце. Михаилов наведе дека, доколку тие лица не биле фатени, би се сомневал дека дрвокрадците намерно предизвикале пожар за да го одвлечат вниманието.
Сепак, од неговата објава не произлегува дека постои утврдена поврзаност меѓу дрвокрадците и пожарот, туку станува збор за негова претпоставка.
Михаилов остро ги осуди и двата случаи, оценувајќи дека уништувањето на шумите и незаконското користење на природните ресурси претставуваат сериозен проблем.
Пожарот во штипскиот регион во изминатите денови предизвикува сериозни проблеми, а поради високите температури и ветерот огнената линија на моменти се ширела кон околните викендички. Надлежните екипи продолжуваат со интервенциите на терен за ставање на пожарот под контрола.