Здружението ОМО „Илинден“ – Пирин реагираше на последните изјави на бугарската потпретседателка Илијана Јотова, отфрлајќи ги нејзините тврдења дека на организацијата постојано ѝ недостасуваат документи за судска регистрација.
Во изјава за весникот „Вечер“, од здружението нагласуваат дека при секој обид за регистрација доставуваат комплетна и уредна документација. Според нив, вистинскиот проблем лежи во односот на надлежните бугарски органи кои, како што наведуваат, системски измислуваат нови и дополнителни барања со цел да го блокираат процесот.
Постапувањето на софиските власти кон македонското здружение веќе години наназад е предмет на критика од меѓународните институции. Европскиот суд за човекови права (ЕСЧП) во Стразбур во повеќе наврати донесе пресуди против Бугарија, утврдувајќи системски повреди на правото на слобода на здружување и мирно собирање во случаите поврзани со ОМО „Илинден“ и ОМО „Илинден“ – Пирин.