Полицијата потврди дека човечките останки пронајдени во пошумена област по пожар ѝ припаѓаат на мајка на три деца која исчезнала пред речиси седум години. Коските биле откриени на 12 август во југозападен Лондон, а сега е потврдено дека ѝ припаѓаат на Џоан Шин, жена која исчезнала во 2019 година, пренесува „Скај њуз“.
Коските биле пронајдени во близина на „Падстоу Вок“ (Padstow Walk) во Фелтам, откако избувнал пожар во пошумената област. Првичните проценки укажувале дека останките ѝ припаѓаат на жена на возраст меѓу 25 и 45 години, што ја поттикнало лондонската полиција веднаш да започне истрага за убиство. По потврдувањето на идентитетот на Џоан Шин, случајот го презела полициската служба на Хемпшир и Островот Вајт.
Полицијата денеска во Саутемптон уапси 56-годишен маж под сомнение за заговор за извршување убиство. Тој моментално се наоѓа во притвор. Џоан Шин имала 44 години кога последен пат била видена на 5 декември 2019 година, додека патувала од Фарем, Хемпшир, кон нејзиниот роден град Саутемптон. Нејзиното семејство официјално пријавило нејзино исчезнување во февруари 2020 година.
„Ова е значаен развој на настаните во оваа долготрајна и сложена истрага. Се појавија неколку нови траги, а нашиот тим веќе детално ги истражува. Иако ова трагично откритие не е исходот на кој се надеваше семејството – или кој било од нас – веруваме дека идентификацијата на нејзините останки конечно ќе понуди барем некакви одговори по сите овие години на неизвесност“, изјави главниот детектив-инспектор Тоби Елкок од Тимот за тешки кривични дела. „Семејството на Џоан Шин покажа неверојатна сила и достоинство во текот на истрагата, во незамисливо тешки околности. Нашите мисли се со нив во овој момент“, додаде Елкок.