За време на посетата на Северна Каролина – клучна држава за исходот од изборите – претседателот Доналд Трамп го повтори ветувањето поврзано со претстојните избори на средината на мандатот. „Ако победиме, ќе добиете 5.000 долари (околу 4.361 евро). Тоа е сè. Многу едноставно“, изјави тој. Сепак, републиканските кандидати кои говореа на истиот митинг не ја спомнаа оваа тема, пренесува „Еј-Би-Си Њуз“ (ABC News).
Нивното молчење одразува поширок тренд. Една недела откако претседателот ја претстави идејата за „дивиденда од Трамп“ на партиската конвенција во Далас, има малку докази дека републиканците кои водат неизвесни изборни трки ја прифатиле таа идеја како дел од своите кампањи.
Ветувањето не стана централна тема во телевизиските реклами, ниту на политичката организација на Трамп, ниту на кандидатите од неговата партија. За тоа главно се дискутира само кога новинарите ќе прашаат, а повеќето републиканци избегнуваат да дадат конкретен одговор во такви ситуации. Републиканскиот национален комитет (RNC) ги гледа предложените исплати како дел од пошироката економска визија на Трамп и смета дека кандидатите треба да ја поддржат.
„Секако, ги охрабруваме сите републикански кандидати да ги засноваат своите кампањи на неговата агенда, која вклучува напори да се стават повеќе пари во рацете на американските граѓани“, изјави портпаролката Натали Балдасаре. Сепак, постојат и исклучоци; републиканскиот претставник Дерик Ван Орден, кој се бори за реизбор во Висконсин, позитивно се изјасни за предлогот.
Идејата за исплата доаѓа во време кога економијата се соочува со зголемени каматни стапки, упорна инфлација и вртоглав раст на цените на горивата. Во меѓувреме, републиканците се борат да го задржат мнозинството во Претставничкиот дом и во Сенатот. Трамп претходно ветуваше исплати од 2.000 долари или повеќе, кои би ги финансирал со приходи од увозни царини и заштеди од Одделот за владина ефикасност, но тие ветувања не беа реализирани.
Претседателот изјави дека смета оти за идејата, која би можела да чини повеќе од еден трилион долари, нема да биде потребно одобрение од Конгресот. И покрај тоа, претседавачот на Претставничкиот дом, Мајк Џонсон, навести дека за такво нешто сепак би била потребна одлука од законодавците.
Демократите потсетуваат на тие претходни најави за да фрлат сомнеж врз новото ветување за исплата од 5.000 долари. „Таа идеја е само рециклирано и неисполнето ветување. Гласачите знаат дека републиканците никогаш нема да го исполнат“, изјави Виет Шелтон, портпарол на Комитетот на демократите за кампањи за Претставничкиот дом. Републиканските изборни штабови главно ги насочија своите реклами кон „Еден голем, прекрасен закон“, кој вклучува одредби за привремено намалување на даноците на бакшишот и на заработката од прекувремена работа. Други кандидати се фокусираат на локални прашања или на напади врз своите противници.
Даг Хеје, републикански стратег и поранешен директор за комуникации на Републиканскиот национален комитет (RNC), вели дека не е тајна зошто кандидатите се двоумат да го прифатат ова ветување. „Тоа е глупава идеја“, рече Хеје. „Не постои начин таа да се финансира, а само би ја поттикнала инфлацијата.“