Невообичаено студениот воздушен бран што го зафати регионот ги донесе и првите снегулки за оваа сезона. Снег веќе падна на српските и бугарските планини, сигнализирајќи го првиот пристигнат зимски сигнал пред самиот крај на септември.
Во Србија, снежни врнежи се забележани на Голија и на Копаоник. Иако врнежите на Голија биле со посилен интензитет, снегот засега не се задржува поради сè уште релативно високите температури на подлогата. На Копаоник, пак, температурите се спуштија до еден степен, што овозможи формирање на првите зимски слики на највисоките врвови.
Слична е состојбата и во соседна Бугарија. Во познатиот центар Пампорово, дождот премина во снег непосредно пред пладне, а снегулки беа забележани и на повисоките делови на Рила, односно околу врвот Мусала. Иако температурата се спушти околу четири степени, според планинските спасувачки служби, снежна покривка сè уште не е формирана.
Студениот фронт од север донесе драстичен пад на температурите и во Македонија. Времето денеска е значително поладни, а на највисоките планински масиви во земјава веќе има услови за појава на првите септемвриски снегулки.