Словенечката полиција синоќа пукаше во 22-годишен маж во областа Шкофја Лока, откако тој наводно ги нападнал со остар предмет. Мажот се здобил со тешки повреди и бил пренесен во болница.
Полициската управа во Крањ соопшти дека полициски службеници биле испратени по повик за итна интервенција околу 21:33 часот, откако било пријавено дека маж им се заканува на луѓе со остар предмет на приватен имот.
Откако полицијата пристигнала на местото, инцидентот продолжил на јавна површина.
Обид за одземање на возило на брза помош
Според досега достапните информации, 22-годишникот тргнал кон полицајците со остар предмет и исто така се обидел да одземе возило на брза помош.
Полицајците го предупредиле да престане со нападот, но – според нивните наводи – тој не постапил по наредбата.
Потоа тие прибегнале кон примена на принудни мерки. Најпрво бил испукан предупредувачки истрел, по што била употребена службеното оружје, бидејќи полицајците изјавиле дека не можеле на друг начин да го запрат нападот со опасниот предмет.
Мажот се здобил со тешки повреди и со возило на брза помош бил пренесен во здравствена установа.
Никој друг не е повреден во инцидентот.
Се истражува и постапувањето на полициските службеници.
Словенечката полиција спроведува форензичка истрага за да се утврдат сите околности на настанот.
За случајот е известено и Специјализираното државно обвинителство, кое се вклучува во случаите кога полицијата употребила огнено оружје, со цел да се обезбеди независна проверка на околностите.
Полицијата најави и внатрешна проверка во врска со законитоста и професионалното постапување при употребата на средства за принуда.