Албанската престолнина вечерва повторно е под опсада на народниот бунт. Студентите и граѓаните, решени да не се повлечат ниту чекор назад, продолжуваат со масовните протести во Тирана, барајќи неодложна оставка од премиерот Еди Рама.
Улиците на градот преку целиот ден беа арена на жестоки судири меѓу демонстрантите и полициските сили. И покрај тоа што полицијата употреби водени топови и солзавец за да ја разбие толпата, незадоволните граѓани остануваат на улиците, порачувајќи дека притисокот и репресијата повеќе не можат да го угушат нивното незадоволство.
„Времето на Рама заврши!“
Гневот на демонстрантите е насочен кон длабоката корупција, неподносливо високите трошоци за живот, катастрофалната состојба со јавните услуги и системското занемарување на потребите на обичниот човек.
„Нема да си заминеме. Еди Рама мора да поднесе оставка! Нека фрла солзавец, нека пука и со ракети, нека ја изведе и војската — нема да му простиме!“ – порача еден од револтираните демонстранти во изјава за албанската телевизија „Њуз24“.
Скапи кирии, празни ветувања и луксуз на сметка на народот
Иако протестите првично беа поттикнати од студентските барања, незадоволството брзо прерасна во сеопшт народен бунт против децениското управување со земјата. Граѓаните алармираат дека по 14 години власт, основните услови за живот во Тирана сè уште не се обезбедени.
Револтиран граѓанин отворено го илустрираше јазот меѓу власта и народот, посочувајќи дека во неговата населба сè уште нема 24-часовно водоснабдување ниту детски градинки, додека кириите за стан во Тирана достигнуваат дури 700 евра месечно.
„Ништо не направи за сите овие години! Ветуваше вода 24 часа, а ја немаме. Кириите ни се по 700 евра, а тој оди во Америка и плаќа по 15.000 евра за ноќевање. Времето на Еди Рама заврши!“ – изјави демонстрантот.
Додека ситуацијата во Тирана останува тензична, демонстрантите се категорични дека нема да има мир на улиците сè додека премиерот Рама дефинитивно не замине од функцијата.