Неизвесна изборна трка за градоначалник на Општина Брвеница. Според првичните резултати на Државната изборна комисија (ДИК), кандидатот на ВМРО-ДПМНЕ, Стојанчо Радичевски, има минимална предност од само 20 гласа пред кандидатот на Националната алијанса за интеграција (НАИ), Аркин Јахиј.
Според податоците објавени во 21:16 часот, обработени се 20 од вкупно 24 избирачки места, односно 83,3 проценти.
Радичевски досега освоил 1.857 гласа, односно 33,65 проценти, додека Јахиј има 1.837 гласа или 33,29 проценти.
На третото место е кандидатот на коалицијата ВЛЕН, Јакуп Хусеини, со 1.218 гласа или 22,07 проценти, додека кандидатот на СДСМ, Јовица Радески, освоил 440 гласа или 7,97 проценти.
Независниот кандидат Душан Богдановски добил 38 гласа, а Арифе Идризи 17 гласа.
Според досега обработените податоци, од 12.752 избирачи на обработените избирачки места, гласале 5.519 граѓани, што претставува излезност од 43,28 проценти. Регистрирани се и 112 неважечки гласачки ливчиња.
Во избирачкиот список на Општина Брвеница се запишани вкупно 16.256 избирачи.
Со оглед на тоа што остануваат необработени уште четири избирачки места, а разликата меѓу двајцата водечки кандидати е само 20 гласа, конечниот исход од изборната трка останува неизвесен.