Германија планира уште од најрана возраст да им обезбеди финансиска основа на идните пензионери, преку нова програма со која државата ќе уплаќа по 10 евра месечно за секое дете. Парите ќе се инвестираат на пазарот на капитал, со цел со текот на годините да ја зголемат својата вредност и да послужат како дополнителна заштеда за пензија.
Право на оваа државна поддршка ќе имаат децата родени во 2020 година и подоцна. Уплатите ќе започнуваат кога детето ќе наполни шест години и ќе продолжуваат до неговиот 18-ти роденден. За период од 12 години, државата ќе уплати вкупно 1.440 евра за секое дете. Условите се детето да има живеалиште во Германија и даночен идентификациски број.
Според пресметките на германското Министерство за финансии, ако вложените средства остваруваат просечен годишен принос од седум проценти, заштедата до полнолетството би можела да достигне околу 2.200 евра. Доколку парите продолжат да се инвестираат до 65-годишна возраст, без дополнителни уплати, износот би можел да надмине 53.000 евра.
Сепак, овие суми се проекции, а не гарантирана добивка. Реалната вредност на заштедата ќе зависи од движењата на финансиските пазари, а пресметките не ги вклучуваат инфлацијата и даноците што би се плаќале при исплатата.
Родителите ќе можат да отворат индивидуална сметка кај лиценциран приватен финансиски давател, на која државата ќе ги уплаќа средствата на име на детето. За државните уплати нема да смеат да се наплатуваат трошоци за склучување договор и дистрибуција. Дополнително, родителите ќе имаат можност да уплаќаат и сопствени средства, до 6.840 евра годишно.
Доколку родителите не отворат индивидуална сметка, средствата автоматски ќе бидат насочени во посебен државен фонд. Парите во него ќе се инвестираат исклучиво во широко диверзифицирани глобални акции или акциски фондови.
Заштедата ќе биде наменета првенствено за пензија, а средствата нема да можат да се продадат, заложат или да бидат предмет на присилна наплата. Според основното правило, исплатата ќе започнува на 65-годишна возраст. Исклучок ќе биде можноста по полнолетството парите да се искористат за купување сопствен станбен простор.
Предвидена е и заштита на средствата во случај на смрт на детето пред да наполни 18 години. Во таков случај, заштедените пари и остварениот принос ќе може да ги наследи семејството, наместо средствата да ѝ бидат вратени на државата.
За оние чии пари ќе бидат вложени во државниот фонд, ќе постои можност средствата да се префрлат во приватен пензиски договор до наполнување на 35-годишна возраст. Доколку тоа не се случи во предвидениот рок, средствата ќе се вратат во сојузниот буџет.
Државните уплати и добивката од инвестициите ќе бидат ослободени од данок во периодот на штедење, додека данок ќе се плаќа при исплатата на пензијата.
За започнување на програмата, Германија во првата година ќе издвои околу 200 милиони евра. Со постепеното вклучување нови генерации деца, годишните трошоци до 2030 година се очекува да достигнат 411 милиони евра. За периодот од 2027 до 2030 година, вкупните буџетски издвојувања за мерката би изнесувале околу 1,2 милијарди евра.