Драматични сцени се случувале во авион на германската авиокомпанија „Еуровингс“, откако неколку патници се пожалиле на стомачни тегоби и повраќање за време на летот од грчкиот остров Родос до Дизелдорф. Поради сомнение за инфекција со норовирус, екипажот побарал приоритетно слетување, а по пристигнувањето биле активирани итни медицински протоколи.
Станува збор за вечерниот лет EW-9631. По слетувањето на аеродромот во Дизелдорф, медицински екипи во заштитни одела влегле во авионот, а тројца патници биле пренесени во болница од претпазливост. Останатите патници морале да останат во леталото околу 90 минути пред да им биде дозволено да излезат.
Една од патничките, 28-годишната Германка Натали Гомбик, која се враќала од одмор, за медиумите изјавила дека ситуацијата во авионот била многу драматична.
Таа раскажала дека за време на летот неколку патници развиле симптоми, меѓу кои и повраќање. Иако сигурно знаела за најмалку тројца патници со тегоби, имала впечаток дека уште толку се чувствувале лошо.
Гомбик посочила дека по слетувањето била шокирана од бројот на возила на Итната помош и медицинските лица во заштитна опрема. Патниците, според неа, во тој момент не знаеле дека била активирана процедура за масовна несреќа. Таа додала дека и самата развила симптоми два дена подоцна.
Инцидентот се поврзува со епидемијата на норовирус на Родос, која, според медиумските извештаи, трае од јули. Грчкиот весник „Катимерини“ објави дека во болницата на островот досега биле згрижени повеќе од 1.400 пациенти, додека бројот на регистрирани случаи достигнал речиси 1.800.
Портпаролот на „Еуровингс“ потврдил дека медицинскиот персонал ги прегледал патниците со симптоми. Тројца биле однесени во болница, додека останатите продолжиле кон своите домови.
Засега, сомнението за норовирус е поврзано со симптомите кај патниците, но од достапните информации не може да се потврди дека инфекцијата е лабораториски докажана кај сите заболени.