Името на организација од Македонија се појавува меѓу 35 здруженија и институции што египетскиот Кривичен суд во Каиро ги прогласил за терористички. Одлуката, објавена во египетскиот службен весник, опфаќа и 36 лица од повеќе европски држави, а нивното внесување во националните регистри ќе важи во период од пет години.
Македонската организација во документот е наведена под арапското име „Таджаму ал-Шабаб ал-Ислами“, што во превод значи „Исламско младинско здружение“.
Засега не е познато за кое точно здружение станува збор. Називот потсетува на „Исламски младински форум – Скопје“, регистриран во Македонија, но нема потврда дека станува збор за истиот субјект, објави порталот „Религија“.
Покрај македонската организација, на списокот се наоѓаат и исламски здруженија и институции од Франција, Велика Британија, Германија, Швајцарија, Шведска, Италија и други европски земји.
Меѓу нив се Советот на муслиманите во Европа, Исламската асоцијација во Велика Британија, Лигата на муслиманите во Швајцарија, Исламската заедница во Германија, Европскиот совет за фетви и истражувања, Европскиот совет на имами и Европскиот институт за хуманистички науки.
Во објавените информации нема дополнително образложение за причините поради кои македонската организација е вклучена во списокот. Не се наведени ниту конкретни докази за нејзина наводна поврзаност со терористички активности.