Македонската режисерка Тамара Котевска постигна уште еден значаен меѓународен успех. Нејзиниот документарен филм „Приказната за Силјан“ го освои Гран-при признанието за најдобар кино-документарец на престижните британски награди „Гриерсон“, кои се доделуваат во Лондон.
Со ова признание, Котевска се вброи меѓу реномираните светски документаристи кои низ годините биле наградувани на оваа манифестација, меѓу кои Вернер Херцог, сер Дејвид Атенборо, Луј Теру, Асиф Кападија и Алекс Гибни.
Филмот „Приказната за Силјан“, реализиран во продукција на National Geographic Documentary Films и Dogwoof, продолжува да освојува меѓународни признанија и да го привлекува вниманието на светската филмска јавност.
Наградите „Гриерсон“, кои го носат името на пионерот на документарниот филм Џон Гриерсон, се меѓу најстарите и најзначајните признанија во британската документарна индустрија, поради што често се нарекуваат и британски „Оскари“ за документарен филм.
Ова е уште едно големо признание за македонската режисерка, која светска афирмација стекна со документарецот „Медена земја“, а неодамна за „Приказната за Силјан“ ја освои и наградата „Зелена панда“ на Wildscreen Panda Awards.
По освојувањето на наградата во Лондон, Котевска истакна дека филмот продолжува да ја потврдува својата вредност по една година исполнета со признанија и фестивалски успеси.
Таа нагласи дека во „Приказната за Силјан“ ги вложила своето срце и целата страст кон филмската уметност.
Новиот успех на Котевска претставува уште една меѓународна потврда за македонската документарна кинематографија и нејзиното присуство на светската филмска сцена.