По историскиот прелет околу Месечината и рекордната оддалеченост од Земјата, екипажот на мисијата „Артемис II“ влегува во завршната и најризична фаза – враќање на Земјата.
Четворицата астронаути на НАСА и Канадската вселенска агенција ја завршија десетдневната мисија, која веќе се смета за најоддалечениот човечки лет досега. Сега нивното внимание е насочено кон повторното влегување во атмосферата и безбедното спуштање во Пацификот.
Според најавите, капсулата „Орион“ треба да слета во водите крај брегот на Сан Диего на 10 април, по што астронаутите ќе бидат преземени од спасувачки тимови и пренесени на американскиот брод „USS John P. Murtha“. Таму ќе следуваат првични медицински прегледи, пред нивното враќање во Хјустон.
Мисијата постави нови рекорди, надминувајќи го досегашниот максимум од „Аполо 13“, откако екипажот се оддалечи повеќе од 248.000 милји од Земјата, а при прелетот покрај Месечината достигна и околу 252.000 милји. Овој успех претставува значаен тест за системите на леталото „Орион“, кое треба да има клучна улога во идните мисии во рамки на програмата „Артемис“.
Во текот на последните денови, астронаутите спроведоа серија проверки и подготовки за враќањето, вклучително и тестирање на системите за влез во атмосферата. Овој дел од мисијата е особено критичен, бидејќи капсулата ќе мора да издржи екстремни температури и силни аеродинамички оптоварувања при т.н. „огнен“ влез.
Освен техничките достигнувања, мисијата привлече и глобално внимание поради снимките од Земјата и Месечината, како и пораките за заедништво и истражување испратени од длабоката вселена. Сепак, пред целосното заокружување на ова историско патување, останува најважното – безбедното враќање на екипажот на Земјата.
