Белгија ја достави до Европската комисија својата национална стратегија за интеграција на Ромите, јави белгиската новинска агенција Белга.
Стратегијата е дел од препораката на Советот на Европа за постигнување „еднаквост, вклученост и учество на Ромите“, се вели во соопштението.
Стратегијата содржи 32 конкретни мерки и се однесува на потребата од спречување на антициганските ставови и на тој начин да се бори против дискриминацијата што ги погодува ромските заедници. Документот има за цел да ја промовира социо-економската интеграција на Ромите преку борба против стереотипите. Стратегијата се стреми да го подобри пристапот до редовно и инклузивно образование, пристап до одржливо вработување, квалитет на живот преку обезбедување пристап до здравствени и социјални услуги и пристап до домување.
Белгија се обврзува да презентира двагодишен извештај до Европската комисија за постигнатиот напредок. Првиот извештај ќе биде претставен во 2023 година.
Бидејќи обработката на лични податоци што откриваат расно или етничко потекло е забранета со закон, Белгија нема централен регистар заснован на етничката припадност и затоа нема официјални податоци за бројот на Роми во земјата.
