Градскиот превоз во централното подрачје на Белград попладнево е целосно запрен, а на сите возачи им е наложено возилата да ги вратат во гаража.
Превозните средства повеќе не сообраќаат низ главниот град на Србија, а засега нема информации кога повторно ќе бидат вратени на улиците.
Запирањето на градскиот превоз се случува на денешниот државен празник Видовден, кога во Белград се најавени повеќе настани – протест на студентите кои го продолжуваат својот штрајк со блокади, литературна вечер пред Народното собрание, доделување на државни одликувања, како и свечена седница на Владата на Србија што се одржува во Крушевац.
Надлежните власти сè уште не се изјаснија кога би можело да се нормализира јавниот сообраќај.