Бугарија од денеска воведува такса за рускиот природен гас што минува низ нејзина територија до Македонија. Оваа нова давачка, која бугарската влада ја претстави како санкција против Русија, ќе важи и за дистрибуцијата во Србија и Унгарија.
Во меѓувреме властите во Македонија бараат начин како да го заобиколат овој данок за да нема негативни последици за економијата на државата. Таксата е 10 евра за мегават час природен гас. Бугарија ја донесе одлуката за овој данок на 13 октомври, а опозицијата во Mакедонија е против воведувањето на таков данок, отфрлајќи го со образложение дека е неуставен.
„Таксите што Бугарија ги наплаќа за транзит на руски гас преку Србија, Унгарија и Северна Македонија се национална мерка и затоа Бугарија мора да одлучи каде ќе ги распредели приходите“, велат од ЕК.
„Ние не се мешаме во нивната фискална политика и во воведување дополнителни давачки. Секоја земја има право да воведува внатрешни даноци, но уценувањето на друга земја на ваков начин е неприфатливо и спротивно на принципите на Европската унија. Колку што знам, Бугарија е членка на Европската Унија и овие механизми мора веднаш да се исфрлат, не само за нашата земја, туку и воопшто, бидејќи се неприфатливи во Европската унија“, велат од Министерството за економија на Македонија.
Бугарските медиуми пишуваат дека Македонија годишно троши околу 450 милиони кубни метри природен гас, потенцирајќи дека и греењето во Скопје е на природен гас.
