Традицијата на ракоплескање по слетувањето на авионот со години ги дели патниците и предизвикува дебати. За да го истражи овој воздухопловен феномен, нискобуџетната авиокомпанија „Виз Ер“ спроведе голема меѓународна анкета која открива дека културните навики играат клучна улога, а една нација се истакнува далеку пред сите други.
Според резултатите од истражувањето објавено месецов, во кое учествувале над 4.500 патници, дури 70% од Бугарите изјавиле дека аплаудираат по безбедно слетување, што ги прави апсолутни шампиони во оваа неофицијална дисциплина.
Зошто аплауз? Олеснување, традиција или возбуда?
Анкетата ги анализира и причините зад овој чин. За многумина, особено за оние со страв од летање, аплаузот е спонтан израз на олеснување и благодарност кон пилотите и екипажот за добро завршената работа.
Сепак, клучниот фактор е културната навика. Резултатите покажуваат дека ракоплескањето е значително почесто во земјите од Источна и Јужна Европа (како Бугарија, Романија и Италија), каде што оваа практика се смета за нормална и се пренесува како колективна традиција. Честопати, доволно е само неколку патници да почнат, по што се активира ефектот на групата и им се придружуваат и други. На крајот, за туристите кои патуваат на одмор, аплаузот е и едноставен израз на радост за пристигнувањето на посакуваната дестинација.
Тивкиот табор: Зошто другите патници молчат?
Од друга страна, патниците кои остануваат тивки имаат сосема поинаква перцепција. За честите патници и деловните луѓе, летањето е рутина, како возење во автобус или воз. Тие сметаат дека безбедното слетување е стандарден и очекуван дел од професијата на пилотот.
Во многу западни и северноевропски земји, како и во Северна Америка, оваа навика е речиси непостоечка, па патниците од тие култури често не ја разбираат традицијата и ја доживуваат како чудна. Некои дури сметаат дека аплаузот е навредлив, бидејќи имплицира дека постоел сомнеж во вештините на пилотот, па безбедното слетување е изненадување кое треба да се прослави.
Заклучокот на „Виз Ер“ е јасен: без разлика дали сте во таборот на „аплаудирачите“ или во „тивкото мнозинство“, вашето однесување најмногу зависи од тоа од каде доаѓате и колку често летате.
Во истражувањето македонците не се споменати.