Данскиот крал Фредерик X денеска започна тридневна посета на Нук, главниот град на Гренланд, во знак на поддршка на територијата за која интерес изрази американскиот претседател Доналд Трамп. Кралот им мавташе на неколкумина Гренланѓани собрани на аеродромот, а го пречека премиерот на Гренланд, Јенс-Фредерик Нилсен, според новинар на АФП кој бил на местото на настанот.
„Дојдовме да го видиме кралот“, изјавил 44-годишен маж, додека неговите сонародници мавтале со знамиња на Гренланд. „Тоа ни е важно“, додал тој.
Дипломатски тензии поради амбициите на Трамп
Посетата доаѓа кратко откако Гренланд се најде во центарот на дипломатски тензии со Вашингтон, откако американскиот претседател Доналд Трамп ја изрази намерата да ја преземе контролата врз огромниот арктички остров, што предизвика незадоволство кај европските лидери.
Најавувајќи ја посетата кон крајот на јануари, 57-годишниот дански крал изјави дека е „длабоко солидарен“ со Гренланѓаните кои се вознемирени од амбициите на Трамп да ја преземе контролата врз оваа автономна данска територија.
Данскиот крал, чија улога е главно симболична, денеска ќе посети средно училиште, рибарска компанија и седиштето на Арктичката команда, задолжена за надзор и заштита на суверенитетот на Кралството Данска во арктичкиот регион, по што денот ќе го заврши со кафе во културен центар.
Програма на посетата и врските со Гренланд
Во четврток треба да отпатува во Маниитсок, околу 150 километри северно од Нук, каде ќе се сретне со локални претприемачи, а во петок ќе го посети арктичкиот центар за обука на данските војници во Кангерлусак.
И покрај колонијалното минато на Данска на оваа автономна територија, монархијата долго време ужива силна популарност на Гренланд.
Фредерик, страстен љубител на активности на отворено, во 2000 година учествуваше во четиримесечна скијачка експедиција долга 3.500 километри низ Гренланд, како дел од патролата „Сириус“, елитна единица на Кралската данска морнарица.
Геополитичко значење на Гренланд
Вашингтон редовно истакнува дека контролата врз Гренланд е клучна за безбедноста на САД и ја обвинува Данска и европските сојузници дека недоволно го штитат ова стратешко подрачје од руските и кинеските амбиции.
Сепак, Трамп се повлече од заканите по потпишувањето рамковен договор со генералниот секретар на НАТО, Марк Руте, чија цел е зајакнување на американското влијание и отворање пат за разговори меѓу Данска, Гренланд и Соединетите Американски Држави.
„Не треба да има сомнеж во мојата љубов кон Гренланд, а мојата врска со народот на Гренланд останува недопрена“, порача Фредерик X во ретка изјава. Овие тензии доведоа до една од најсериозните кризи во историјата на НАТО од 1949 година.
