Борбата против катастрофалните шумски пожари во Франција и Шпанија влезе во нова, драматична фаза. Иако благиот пад на температурите и слабиот ветер им овозможија на пожарникарите делумно да го забават напредувањето на огнот, опасноста секојдневно расте со најавата за нов топлотен бран.
Францускиот претседател Емануел Макрон го посети оперативниот центар во Жиронда, од каде што упати порака на благодарност до пожарникарите за нивната пожртвуваност.
„Земјата се соочува со пожар каков што Франција нема доживеано од Втората светска војна. Државата ќе остане со загрозеното население колку и да биде потребно“, изјави Макрон.
Најновиот биланс од Жиронда покажува дека огнот досега проголтал најмалку 240 куќи, речиси сто повеќе од првичните процени. За жал, бројката не е конечна бидејќи спасувачките тимови дури сега влегуваат во опожарените населби каде што се затекнуваат само згаришта.
Повредени десетици пожарникари, се појави и редок природен феномен
Цената на оваа природна катастрофа ја плаќаат и оние на првата борбена линија. Од избувнувањето на пожарите, повредени се 84 пожарникари, од кои дел завршија во болница поради труење со јаглерод моноксид и изложеност на густ, токсичен чад. Синдикатите алармираат дека условите се екстремни и бараат дополнителна заштитна опрема.
Француските стручњаци посебно ја издвојуваат појавата на таканаречениот пирокумулонимбус – огромен облак кој се формира над самите пожари. Овој феномен создава молњи и огнени вртлози, кои како вулкан исфрлаат ужарени искри на голема оддалеченост, правејќи го ширењето на пламенот целосно непредвидливо.
Шпанија ја забележа првата човечка жртва
Ниту во Шпанија нема предавство на огнената стихија. И покрај краткото затишје, пожарите околу Мадрид, Авила и Толедо сè уште не се ставени под целосна контрола.
Земјата ја забележа и првата човечка жртва – маж загина во местото Манисес во близина на Валенсија, додека неколку лица се здобија со тешки изгореници и респираторни проблеми. Погодените области ги посетија премиерот Педро Санчез и кралот Фелипе Шести, кои повикаа на национално единство и ветија итна државна помош за обнова.
Поради сериозноста на ситуацијата, Брисел веќе мобилизираше авиони за гасење пожари, хеликоптери и дополнителни тимови преку Механизмот за цивилна заштита на ЕУ, а помош пристигнува од повеќе европски држави. Сепак, метеоролозите предупредуваат дека вистинскиот предизвик доаѓа со новиот бран високи температури, поради што сите служби остануваат во состојба на највисока подготвеност.