Државниот врв со честитки за 28-ми август „Успение на Пресвета Богородица“ – „сета благодарност и поддршка одат кон сите здравствени работници кои во ниту еден миг немаа одмор“

Државниот врв испрати честитки по повод 28-ми август, големиот христијански празник Успение на Пресвета Богородица. Претседателот на државата Стево Пендаровски посака празникот да го минеме пред се во добро здравје, исполнети со љубов, радост и среќа.

„За жал како и минатата година и сега ќе мораме да празнуваме во изменети околности, почитувајќи ги сите правила и препораки за заштита од пандемијата на Ковид 19. Соочувајќи се со пикот на четвртиот бран да бидеме одговорни и дисциплинирани. Да им даруваме љубов на ближните, имајќи особена почит за родителите, а разбирање и прифаќање за децата. Да не дозволиме ништо да ја разниша нашата вера и оптимизам и да ги сочуваме своите вредности и верувања без разлика на тешкотиите со кои се соочуваме. Сплотени да продолжиме да делиме милост и разбирање, отворајќи ги срцата за сите“, рече претседателот на државата Стево Пендаровски.

Порака испрати и првиот човек на законодавниот дом, Талат Џафери кој посака над сѐ добро здравје, душевен мир, семејна среќа и топлина, меѓу-граѓанска почит и хармонија.

„За жал, предизвикот со кој се соочуваме минатите години, придружен со сите тешкотии и болки што ги носи пандемијата на вирусот, се уште е надвиснат над нашите глави и јас, дозволете да го повторам тоа што го велам при секоја честитка до Вас, почитувани граѓани, празнувајте внимателно, почитувајте  ги препорачаните протоколи од здравствените институции и бидете одговорни, кон себе, кон вашите блиски, кон Вашите сограѓани. Секако, сета благодарност и поддршка одат кон сите здравствени работници кои  во ниту еден миг немаа одмор и  со натчовечка посветеност се грижат за здравјето на сите нас“, вели во испратената честитка Талат Џафери.

До објавувањето на овој текст, честитика од премиерот Заев не беше пристигната.