Претседателката на Европската комисија, Урсула фон дер Лајен, во Тирана изјави дека проширувањето на Европската унија ќе остане приоритет во нејзиниот втор мандат и ги пофали напорите на Владата на Албанија во процесот на евроинтеграции.
На почетокот на турнејата по Западен Балкан, на заедничка прес-конференција по средбата со албанскиот премиер Еди Рам, Фон дер Лајен рече дека Албанија постигнала голем успех со отворањето на кластерот 1 во пристапните преговори со ЕУ минатата недела, пренесува Јуронуз во албански.
„Бидете сигурни дека проширувањето ќе биде приоритет во продолжувањето на мојот мандат, ги имаме сите механизми за добра работа“, рече Фон дер Лајен, кој ќе ги посети и Северна Македонија, Босна и Херцеговина, Србија, Косово и Црна Гора за време на турнејата.
Таа изрази задоволство од отворањето на кластерот 1 во преговорите со Албанија и ја истакна важноста на Европскиот план за раст за Западен Балкан, кој на Албанија ќе и донесе 920 милиони евра, од кои 64 милиони до крајот на годинава.
„Минатата недела го отворивме првиот кластер во пристапните преговори. Почитуван Еди, тоа е голем успех кој доаѓа како резултат на многу, многу години напорна работа, но и на посветеност на таа заедничка цел“, изјави Фон дер Лејен.
Таа додаде дека Планот за раст на ЕУ ја отвора вратата за секој партнер во Западен Балкан и го пофали тимот на Рама за „одлична работа“ кога станува збор за реформската агенда.
„Сега треба да почнеме да финансираме со 64 милиони евра пред крајот на годината. Албанија од Планот за раст ќе добие вкупно повеќе од 920 милиони евра, што ќе донесе и други резултати. На пат сте да станете дел од единствената платежна зона на еврото (СЕПА систем). Тоа значи дека трансферите на пари ќе бидат побезбедни и побрзи“, изјави Фон дер Лејен.
Фон дер Лајен и Рама разговараа и за проекти од областа на обновливите извори на енергија и енергетската ефикасност и неутралноста на јаглеродот.
„Знаете дека ЕУ почна да работи на јаглеродна неутралност до 2050 година, но тоа не треба да биде голем предизвик за вас, бидејќи вие сте лидер во таа област“, рече Фон дер Лајен.
Рама рече дека Албанија е цврсто посветена на патот кон ЕУ и е убедена во неговата исправност.
„Сакаме да бидеме во ЕУ оваа деценија. Албанија е на пат кон Запад“, рече Рама.
