Силно невреме попладнево го зафати Скопје, а силните налети на ветер предизвикаа и материјална штета во централното градско подрачје. Од една зграда во Центар бил откорнат дел од покривот.
Невремето донесе засилен ветер, пороен дожд и грмежи, а граѓаните на социјалните мрежи споделуваат фотографии и видеа од силните атмосферски процеси во главниот град.
Според прогнозите на Управата за хидрометеоролошки работи (УХМР), денеска времето е нестабилно со локални врнежи од дожд, грмежи и засилен ветер. На повеќе места се очекуваат поинтензивни процеси со пороен дожд, силни грмежи, ветер со брзина над 60 километри на час и услови за краткотрајно невреме со град.
Од УХМР информираат дека и во Скопската Котлина постои можност за појава на краткотрајни невремиња проследени со пообилен дожд, грмежи и засилен ветер.
Надлежните апелираат граѓаните да бидат внимателни, особено во периоди на силни налети на ветер, и да избегнуваат престој под дрвја, рекламни паноа и други нестабилни конструкции.